طلب اغية رابح درياسة التي تتكلم عن المدن

[rostoum3]

من فضلكم اغنية رابح درياسة الجديدة التي تتكلم عن المدن والتي اعاد كتابتها وتوزيعها اموسيقي من جديد

[icosi]

السلام عليكم، من فضلكم اغنية سيدنا يوسف رابح درياسة

صلُّوا على بدر الدَّاج الهاشمي مول التاج
وسلموا يا لفواج على النبي زين الجاه
يا رجال اهل الله

ذي القصيدة نهديها للاحباب و نرويها
يا لَبيب اسمع ليها كلام فيها ما احلاه
يا رجال اهل الله

قصة النبي يوسف كيف ربي بِه لطف
و البلا عنّو صرََّف و نال نعمة مولاه
يا رجال اهل الله

كيف ما جا في الآية قال يوسف يا بويا
ريت في نومي رؤيا وخيالها ما ننساه
يا رجال اهل الله

القمر طل عليا وشمس ونجوم بهية
في السما سجدو ليا وقول لي ما معناه
يا رجال اهل الله

قالو هفت صوتك لا يفيقو لك خوتك
يرغبو لك في موتك والسابقة عند الله
يا رجال اهل الله

خاوتو غارو منو حاسدين صغر سنو
قال نَتْهَنَّوْ منو رايحين لباباه
يا رجال اهل الله

قالو يا بابانا يروح يوسف معانا
عندنا ليه حنانة غير نلعب معاه
يا رجال اهل الله
خاف باباهم وآبى قال تضحو لعابة
وياكلو ذيب الغابة وما نزيدش نلقاه
يا رجال اهل الله

غلبوه وصدقهم وراح يوسف معاهم
كيف ما كانت لهم السابقة عند الله
يا رجال اهل الله

دَرْڤوه على بوه عَوْلو يقتلوه
للذيابة يرموه و هكذا كان قضاه
يا رجال اهل الله

خالفو كلمة بوهم لا محانو كادوهم
صايلين على خوهم وكل واحد ببلاه
يا رجال اهل الله

قال خوهم لَكبير تبعو رايي خير
لوحوه في قاع البير يموت ثم و ننساه
يا رجال اهل الله

رماو يوسف في البير والله بيهم بصير
وما يقدر يصير و ليس حاجة تخفاه
يا رجال اهل الله

ثوبو اداوه لبوه وبدم كاذب رشوه
حلفوا لبوه و غروه بحكاية الذيب كلاه
يا رجال اهل الله

وكيف راد المكتوب وراح ولدو يعقوب
وعاش بصبر ايوب وراح بصرو من بكاه
يا رجال اهل الله
جات القوافل تسير فوق ناقة وبعير
وغداو حتى للبير باه يرواو بماه
يا رجال اهل الله

طلعوا الدلو بما فيه شد النبي واحكم فيه
والنور طالع عليه مثل البدر بان ضياه
يا رجال اهل الله

لما خرج شاف النور نورو سطع فات النور
جسدو ينسم بعطور مستور بحجاب الله
يا رجال اهل الله

تباشرو لو لخوان لما ظهر ليهم بان
كي شاهدوه بلعيان نطقوا بسبحان الله
يا رجال اهل الله

جبدوه ونبسطو بيه قامو الديوان عليه
كسبوه واشتركو فيه وهكذا كان قضاه
يا رجال اهل الله

اداوه ذوك الناس لبلاد مصر يا ناس
والزين كيفاه يرخاص ويجوز بيعو و اشراه
يا رجال اهل الله

ولالهم عبد مطيع حطوه سلعة للبيع
وعرضوه للناس جميع ولي بمالو يسواه
يا رجال اهل الله

اشراه منهم سلطان ودار لو عز و شان
وكان لو عز مكان كي عاد في القصر معاه
يا رجال اهل الله
و مرت ذاك السلطان تولعت بيه عيان
و دار بيها شيطان متبعه غير بلاه
يا رجال اهل الله

شاع الخبر عنها سار كل النسا قالو عار
و مراودة عبد الدار و زوجها كان شراه
يا رجال اهل الله

وباشرت دون سماح ودارت لهم افراح
واعطاتهم التفاح و جابت لُمّاس معاه
يا رجال اهل الله

ودخلت زين الزين عادو الكل مخلوعين
يقطعوا في اليدين من زين نبي الله
يا رجال اهل الله

وبعد ما شاع خبرها وراودتو وحرمها
اشتكات لراجلها وجا و في الحبس ارماه
يا رجال اهل الله

وهكذا راد الله وانحبس زين الجاه
وذيك حكمة الله وما حكمها سواه
يا رجال اهل الله

ونام ذاك السلطان نوم وبقى حيران
وغير ربي سلطان ولا سلاطن سواه
يا رجال اهل الله

نام ببقرات شيان أكلاو بقرات سمان
وخاف وبقى حيران في المنام و معناه
يا رجال اهل الله
ونام سبع سبولات خضر وسبع سبولات
يبسو ولاو اشتات وحالهم ما غناه
يا رجال اهل الله

وصاحب يوسف كان معاه مسجون زمان
وله وزير السلطان احكالو منامو و ارواه
يا رجال اهل الله

قالو ارجاني بلخف نروح لحبيبي يوسف
هو يفسر وينصف عندي التجريب معاه
يا رجال اهل الله

جابو فسر لمنام وحاطتو كل نعام
وكان لو عز مقام وعاد في الحكم معاه
يا رجال اهل الله

والله لا ليه شريك منعو لا تشكيك
و فاز و اصبح مليك والحق يقضي بقضاه
يا رجال اهل الله

وخاوتو ربي راد وجاو يديو الزاد
وفي نهار الميعاد شافهم زين الجاه
يا رجال اهل الله

قال ليهم يا عير كان حبيتو خير
آتو بخوكم اصغير وما تجوني غير معاه
يا رجال اهل الله

راحو لبوهم في الحين قالو احنا مأمورين
نديو خونا معين ونجيب خير من الله
يا رجال اهل الله
وقال ليهم يعقوب بركاو من ذو لكذوب
ودرتو بيوسف ذنوب وتديو ولدي و علاه
يا رجال اهل الله

وبعد خوفو يا ناس غلبوه و قطع لياس
و عطالهم ولدو غاس في قضا أمر الله
يا رجال اهل الله

اداو خوهم و مشاو وصلو من الخير ملاو
و قامو الحرس و ناداو ولي سرق واش جزاه
يا رجال اهل الله

قام النبي واتهم خوه لي معاهم جابوه
و ناضو الحرس و شدوه و اداوه لو لحذاه
يا رجال اهل الله

قال لو اسكت انا خوك أيا و خلي هذوك
أفرحت لك كي جابوك و ذاك تقدير الله
يا رجال اهل الله

قالو الخاوة لله لينا وْصَايَةْ باباه
كفيف و يزيد بلاه و اذا تعذب مڤواه
يا رجال اهل الله

واشتاق يوسف أبيه اعطالهم ثوبو ليه
ارميوه على عينيه يشوفكم باذن الله
يا رجال اهل الله

عادو لبوهم بالخير والله بالغيب خبير
و لي ماكتب يصير و ليس حاجة تخفاه
يا رجال اهل الله
جبدو لبوهم الثوب و فاح طيب المحبوب
ولَّا البصر لليعقوب و عاد للنظر ضياه
يا رجال اهل الله

و راح شاف المنصور شاف البدر شاف النور
ولا بيوسف مسرور و نال نعمة مولاه
يا رجال اهل الله

سجدو لهم كل الناس في ملك يوسف يا ناس
وجا التفسير قياس لحلم نبي الله
يا رجال اهل الله

تميت هذا المضمون كيما بديتو متقون
برضا شيوخ الملحون وسماح شيخي وارضاه
يا رجال اهل الله

ودرت القصيدة بحكام في عام ستين تمام
وزيدها تسع اعوام تاريخ للي يقراه
يا رجال اهل الله

كتبتها يا لخوان في ليلة شهر رمضان
لثنين ليلتها بان ضي الهلال وشفناه
يا رجال اهل الله

قولو اسمي للي يسال و بداوهلو بالدال
و الرا مع اليا تطوال بليف و السين بتاه
يا رجال اهل الله

بويا اسمو بن مسعود في بلاد جندل مزيود
وبني أحمد ناس الجود زادو لمحمد جاه
يا رجال اهل الله
و لعين لشياخ ندور نشفا القبة ونزور
شيخ الروابح مشهور اسمي اديتو من سماه
يا رجال اهل الله

والرابحي مول الشان عم الحنينة سلطان
جلول مول البرهان وليت نلغا بلغاه
يا رجال اهل الله

ولي نسب هذا القول لغير رابح معزول
وكل جاحد مذلول ساسو على الريح بناه
يا رجال اهل الله

وكمالة القول سلام للي سمع ذا التنظام
بصلاة خير الأنام الهاشمي زين الجاه
يا رجال اهل الله

صلوا على بدر الداج الهاشمي موله التاج
وسلموا يا لفواج على النبي زين الجاه
يا رجال اهل الله